ກອງປະຊຸມຖອດຖອນບົດຮຽນປະຈຳປີ 2015-2016 ຂອງກົມກິດຈະການນັກສຶກສາ

ກົມກິດຈະການນັກສຶກສາ (ສສກ) ຖອດຖອນບົດຮຽນການຄຸ້ມຄອງ ແລະ ຕິດຕາມນັກສຶກສາ

       ກົມກິດຈະການນັກສຶກສາ ກະຊວງສຶກສາທິການ ແລະ ກິລາ (ສສກ) ຈັດກອງປະຊຸມຖອດຖອນບົດຮຽນກ່ຽວກັບວຽກງານການຄຸ້ມຄອງ, ຈັດສົ່ງ, ຕິດຕາມນັກສຶກສາທັງພາຍໃນ ແລະ ຕ່າງປະເທດ ປະຈຳສົກປີ 2015-2016 ເພື່ອສະຫຼຸບ ແລະ ຕີລາຄາຄືນກ່ຽວກັບວຽກງານໃນໄລຍະຜ່ານມາ ພ້ອມວາງທິດທາງແຜນການໃນຕໍ່ໜ້າ.

        ກອງປະຊຸມດັ່ງກ່າວ, ໄດ້ຈັດຂຶ້ນເມື່ອວັນທີ 5 ທັນວາ ຜ່ານມາ ທີ່ຫ້ອງປະຊຸມເຂື່ອນໄຟຟ້ານ້ຳງື່ມ 1, ເມືອງ ແກ້ວອຸດົມ ແຂວງ ວຽງຈັນ ໂດຍພາຍໃຕ້ການເປັນປະທານຂອງ ທ່ານ ຮສ.ປອ ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີບັນດາຫົວໜ້າ-ຮອງຫົວໜ້າກົມ, ຜູ້ຕາງໜ້າຈາກຫ້ອງການ, ສູນ, ສະຖາບັນອ້ອມຂ້າງກະຊວງ, ຕາງໜ້າຈາກພະແນກສຶກສາທິການ ແລະ ກິລາ ແຂວງ/ນະຄອນຫຼວງວຽງຈັນ, ຕາງໜ້າຈາກຫ້ອງການສຶກສາ ແລະ ວັດທະນະທຳ ປະຈຳ ສສ.ຫວຽດນາມ, ຈີນ ແລະ ປະເທດໄທ, ສະຖານກົງສູນໃຫ່ຍ ແຫ່ງ ສປປ ລາວ ປະຈຳນະຄອນຄຸນມິງ ສປ.ຈີນ, ນະຄອນໂຮ່ຈິມິນ ແລະ ນະຄອນດານັງ, ບັນດາກະຊວງ ແລະ ອົງການທຽບເທົ່າ, ຕາງໜ້າຈາກພະແນກການຕ່າງປະເທດແຕ່ລະແຂວງ, ມະຫາວິທະຍາໄລ ແລະ ວິທະຍາໄລຕ່າງໆທີ່ກ່ຽວຂ້ອງ ເຂົ້າຮ່ວມກວ່າ 50 ທ່ານ.

        ໃນກອງປະຊຸມ, ທ່ານ ສຈ.ປອ ຄຳລືຊາ ນວນສະຫວັນ ຫົວໜ້າກົມກິດຈະການນັກສຶກສາ ໄດ້ຜ່ານບົດສະຫຼຸບການເຄື່ອນໄຫວວຽກງານ ສົກປີ 2015-2016 ໃຫ້ຮູ້ວ່າ: ການປະຕິບັດທຶນການສຶກສາປະເພດຕ່າງໆ ໃນສົກປີ 2015-2016 ແມ່ນປະກອບມີຫຼາຍປະເພດຕາມແຫຼ່ງຂອງທຶນເປັນຕົ້ນ ທຶນຮ່ວມມື 2 ຝ່າຍ ຂອງລັດຖະບານ, ທຶນອົງການຈັດຕັ້ງສາກົນ, ທຶນໂຄງການ, ທຶນມູນນິທິສາກົນ, ທຶນແລກປ່ຽນນັກສຶກສາ ແລະ ທຶນສ່ວນຕົວ; ທຸກກໍລະນີການຮັບເອົາທຶນຂອງຕ່າງປະເທດທີ່ມາຜ່ານກະຊວງສຶກສາທິການ ແລະ ກິລາ ແມ່ນໄດ້ຮັບຄຳເຫັນດີຈາກຮອງລັດຖະມົນຕີ ຜູ້ຊີ້ນຳ, ຈາກນັ້ນກົມທີ່ກ່ຽວຂ້ອງຈຶ່ງປະກາດແຈ້ງທຶນຜ່ານສື່ຕ່າງໆ ເປັນຕົ້ນ ຜ່ານເວັບໄຊຂອງກົມ, ໜັງສືພິມ, ວິທະຍຸ ແລະ ໂທລະພາບ.

        ສຳລັບຮູບແບບການຄຸ້ມຄອງປະຕິບັດຂະບວນການຄັດເລືອກຜູ້ຮັບທຶນ ແມ່ນຈະມີຄວາມແຕກຕ່າງກັນຕາມຄວາມແຕ່ລະແຫຼ່ງທຶນ. ສະເພາະສະຖິຕິນັກສຶກສາທີ່ໄປຮຽນຕ່າງປະເທດ ສົກປີ 2015-2016 ມີທັງໝົດ 5.260 ຄົນ, ຍິງ 2.151 ຄົນ, ເຊິ່ງໄປຮຽນໃນ 25 ປະເທດ, ໂດຍແຍກຕາມປະເພດຄື: ນັກຮຽນສາມັນ ມີ 4.143 ຄົນ, ຍິງ 1.843 ຄົນ, ພະນັກງານ ມີ 1.116 ຄົນ, ຍິງ 308 ຄົນ, ພະສົງມີ 1 ອົງ.

        ສ່ວນທິດທາງແຜນການເຄື່ອນໄຫວປະຈຳສົກປີ 2016-2017 ແມ່ນຈະໄດ້ສືບຕໍ່ປະຕິບັດວຽກງານການຄຸ້ມຄອງນັກສຶກສາ ໂດຍໄປຕິດຕາມສະພາບຂອງນັກສຶກສາລາວຢູ່ບັນດາປະເທດໃກ້ຄຽງທີ່ມີນັກສຶກສາໄປຮຽນຫຼາຍ ເປັນຕົ້ນແມ່ນ ສສ.ຫວຽດນາມ, ສປ.ຈີນ, ໄທ ແລະ ກຳປູເຈຍ; ຂຶ້ນແຜນໄປຖອດຖອນບົດຮຽນວຽກງານການຄຸ້ມຄອງ ແລະ ຕິດຕາມນັກສຶກສາທີ່ປະເທດ ອອສເຕຣເລຍ ແລະ ປະເທດ ນິວຊີແລນ; ປະສານກັບກະຊວງການຕ່າງປະເທດ ເພື່ອຄວາມສະດວກໃນການຕິດຕາມນັກສຶກສາລາວຢູ່ຕ່າງປະເທດ ໂດຍຂໍໃຫ້ສະຖານທູດ ແລະ ສະຖານກົງສູນປະຈຳຢູ່ປະເທດນັ້ນໆເປັນຜູ້ຊ່ວຍຕິດຕາມ ແລະ ລາຍງານໃຫ້ຊາບຕາມເວລາອັນເໝາະສົມ; ປັບປຸງ ແລະ ສ້າງບັນດານີິຕິກຳທີ່ກ່ຽວຂ້ອງກັບການຄຸ້ມຄອງນັກສຶກສາ ແລະ ວຽກງານອື່ນໆ.

        ຂະນະດຽວກັນ, ທ່ານ ຮສ.ປອ ກອງສີ ແສງມະນີ ໄດ້ມີຄຳເຫັນຊີ້ນຳໃນກອງປະຊຸມບາງບັນຫາ ວ່າ: ການປະຕິບັດທຶນຮ່ວມມືກັບສາກົນໂດຍສະເພາະກັບ ສປ.ຈີນ ແລະ ສສ.ຫວຽດນາມ ຕ້ອງປະຕິບັດຕາມເນື້ອໃນສັນຍາ 2 ຝ່າຍ, ເຊິ່ງຜ່ານແມ່ນມີການສອບເສັງ ແຕ່ປັດຈຸບັນໄດ້ຄັດເລືອກເອົາຕາມການຊີ້ນຳຂອງຂັ້ນເທິງ ຕາມແຜນຮ່ວມມືສະເພາະຂອງກະຊວງສຶກສາທິການ ແລະ ກິລາ ກັບ ກະຊວງສຶກສາ ແລະ ກໍ່ສ້າງ ສສ.ຫວຽດນາມ; ການປະຕິບັດທຶນຂອງແຕ່ລະປະເພດໃຫ້ປະຕິບັດຕາມແຫຼ່ງທຶນກ່ຽວຂ້ອງ, ແຕ່ການຄຸ້ມຄອງຜູ້ໄປຮຽນຕ້ອງອາໄສທູດ, ກົງສູນ ຫຼື ຫ້ອງການສຶກສາ ແລະ ວັດທະນະທຳ ປະຈຳສະຖານທູດລາວເປັນຜູ້ຕິດຕາມການເຄື່ອນໄຫວ ແລະ ລາຍງານກ່ຽວກັບສະພາບຂອງນັກສຶກສາລາວທີ່ຢູ່ປະເທດນັ້ນ.

        ພ້ອມດຽວກັນນັ້ນ, ແມ່ນໃຫ້ແຕ່ລະພາກສ່ວນເລັ່ງໃສ່ບູລິມະສິດວິຊາຮຽນເຂົ້າໃສ່ແຜນການຮ່ວມມືປະຈຳປີຕາມສາຂາວິຊາທີ່ປະເທດຊາດຕ້ອງການ ເປັນຕົ້ນແມ່ນ ວິສະວະກອນລົດໄຟ, ລົດໄຟຄວາມໄວສູງ, ກົນຈັກເພື່ອຮອງຮັບແຜນຮ່ວມມືໃນຕໍ່ໜ້າ, ຖ້າແຕ່ລະແຂວງທີ່ມີແຜນການຮ່ວມມືກັບ ສປ.ຈີນ ຄວນຄັດເລືອກໃນສາຂາວິຊາດັ່ງກ່າວໃຫ້ເປັນບູລິມະສິດຂອງແຂວງ; ການຄັດເລືອກນັກສຶກສາໄປຮຽນຕ້ອງກວດເອກະສານໃຫ້ລະອຽດ, ເບິ່ງຫຼາຍດ້ານ, ເບິ່ງຂໍ້ມູນເງື່ອນໄຂຂອງຝ່າຍໃຫ້ທຶນ ແລະ ເງື່ອນໄຂຂອງຜູ້ຮັບທຶນໃຫ້ຮອບດ້ານກ່ອນຄັດເລືອກເອົານັກສຶກສາເຂົ້າຮັບທຶນ; ການເຊັນສັນຍາກັບຕ່າງປະເທດຕ້ອງເບິ່ງແຜນຮ່ວມມືຂອງລັດຖະບານເປັນຫຼັກ. ສ່ວນທ້ອງຖິ່ນໃຫ້ເບິ່ງແຜນຮ່ວມມືໃນຂົງເຂດວິຊາຕ່າງໆຂອງແຂວງ ບົນພື້ນຖານຕາມແຜນຂອງລັດຖະບານ; ໃຫ້ແຕ່ລະພາກສ່ວນກວດເບິ່ງຄືນກ່ຽວກັບການເຊັນສັນຍາ ເມື່ອເຊັນໄປແລ້ວເຮົາໄດ້ຫຍັງ, ມີຜົນເສຍແນວໃດໃນປັດຈຸບັນ ແລະ ອະນາຄົດ, ຖອດຖອນສະຫຼຸບໃນແຕ່ລະໄລຍະ ພ້ອມທັງໃຫ້ທຸກພາກສ່ວນມີສະຕິຕໍ່ກຸ່ມຄົນທີ່ບໍ່ຫວັງດີ ເປັນນາຍໜ້າຂົນຂວາຍຄົນລາວໄປຮຽນຕ່າງປະເທດໃນຮູບການຕ່າງໆ, ໃຫ້ປະຕິບັດຕາມແຈ້ງການແນະນຳທີ່ສົ່ງໃຫ້ແຕ່ລະພາກສ່ວນຂອງກະຊວງສຶກສາທິການ ແລະ ກິລາ; ມີການຄຸ້ມຄອງການປະຕິບັດສັນຍາຮັດກຸມ ໂດຍສະເພາະ ວຽກງານການສຶກສາສາກົນໃຫ້ແກ່ ສປປ ລາວ ເພື່ອຫຼີກລ່ຽງຫາງສຽງທີ່ບໍ່ດີໃນສັງຄົມຕໍ່ກັບວຽກງານດັ່ງກ່າວ.