ກອງປະຊຸມບັນດາຜູ້ໃຫ້ທຶນການສຶກສາ ແກ່ ສປປ ລາວ

ກົມກິດຈະການນັກສຶກສາ (ສສກ) ຫາລືຮ່ວມບັນດາຜູ້ໃຫ້ທຶນການສຶກສາແກ່ ສປປ ລາວ

       ກົມກິດຈະການນັກສຶກສາ ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມບັນດາຜູ້ໃຫ້ທຶນການສຶກສາ ແກ່ ສປປ ລາວ ເມື່ອວັນທີ 29 ພະຈິກ ຜ່ານມາທີ່ກະຊວງສຶກສາທິການ ແລະ ກິລາ ໂດຍໃຫ້ກຽດເຂົ້າຮ່ວມຂອງ ທ່ານ ຮສ.ປອ ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ສຈ.ປອ ຄຳລືຊາ ນວນສະຫວັນ ຫົວໜ້າກົມກິດຈະການນັກສຶກສາ ກະຊວງສຶກສາທິການ ແລະ ກິລາ ພ້ອມດ້ວຍຜູ້ຕາງໜ້າຈາກຫ້ອງການ, ກົມ, ສູນ, ສະຖາບັນການສຶກສາ, ບັນດາປະເທດຄູ່ມຮ່ວມພັດທະນາ ແລະ ຜູ້ໃຫ້ທຶນການສຶກສາຈາກພາກສ່ວນຕ່າງໆເຂົ້າຮ່ວມ.

       ໂອກາດດັ່ງກ່າວ, ທ່ານ ຮສ.ປອ ກອງສີ ແສງມະນີ ໄດ້ກ່າວວ່າ: ກອງປະຊຸມດັ່ງກ່າວ ແມ່ນເປັນກອງປະຊຸມທີ່ມີຄວາມໝາຍຄວາມສຳຄັນ ໃນການແລກປ່ຽນບັນດາຄູ່ຮ່ວມພັດທະນາໃນໄລຍະຜ່ານມາ. ນອກຈາກນັ້ນ, ຍັງຮຽກຮ້ອງ ແລະ ສະເໜີໃຫ້ສືບຕໍ່ຄົ້ນຄວ້າສັບຊ້ອນທຶນການສຶກສາທີ່ມາຈາກແຕ່ລະປະເທດ ເພື່ອແບ່ງປັນໄປຍັງພາກສ່ວນຕ່າງໆໃຫ້ທົ່ວເຖິງ ແລະ ສະເໜີໃຫ້ບັນດາຜູ້ໃຫ້ທຶນການສຶກສາພາກສ່ວນຕ່າງໆໄດ້ແລກປ່ຽນກ່ຽວກັບການໃຫ້ທຶນການສຶກສາ ໂດຍສະເພາະເລືອກວິຊາຮຽນໃນແຕ່ລະສາຂາທີ່ເຫັນວ່າມີຄວາມສຳຄັນໃນການພັດທະນາການສຶກສາຂອງ ສປປ ລາວ ເປັນຕົ້ນແມ່ນການກໍ່ສ້າງ ເຄຫາ, ເຄມີ, ຊີວະສາດ, ໄອທີ, ກົນຈັກ, ກະສິກຳປຸງແຕ່ງ ແລະ ຂະແໜງລົດໄຟ, ການບິນ ແລະ ຫຼາຍຂະແໜງການຕ່າງໆ ທີ່ນັກຮຽນ-ນັກສຶກສາລາວບໍ່ຢາກໄປຮຽນ.

       ພ້ອມດຽວກັນນັ້ນ, ທ່ານຮອງລັດຖະມົນຕີ ກະຊວງ ສສກ ຍັງໄດ້ຮຽກຮ້ອງໃຫ້ປະເທດຄູ່ຮ່ວມພັດທະນາ ແລະ ຜູ້ໃຫ້ທຶນການສຶກສາ ສືບຕໍ່ໃຫ້ແກ່ ສປປ ລາວ ໃນຫຼາຍສາຂາວິຊາຕ່າງໆ ເພື່ອເປັນທາງເລືອກໃນການພັດທະນາຂະແໜງການສຶກສາ ແລະ ກິລາ ສປປ ລາວ ແລະ ສະເໜີໃຫ້ເປີດຫຼັກສູດໃນຂະແໜງຕ່າງໆ ເປັນຕົ້ນແມ່ນຂະແໜງປ່າໄມ້, ເຟີນິເຈີ ແລະ ໃຫ້ເປີດສອນຫຼັກສູດທີ່ເຫັນວ່າຄວນຈະໃຫ້ທຶນໃນຂະແໜງໃດ. ຄຽງຄູ່ກັນນັ້ນ, ການຄັດເລືອກນັກຮຽນໄປຮຽນນັ້ນ ຍັງເຮັດບໍ່ໄດ້ດີ, ຍັງມີນັກຮຽນຈຳນວນໜຶ່ງຄະແນນບໍ່ພໍແຕ່ຍັງໃຫ້ໄປຮຽນ, ຍ້ອນການຈັດຕັ້ງມີຄວາມຈຳເປັນ ເພາະວ່າພໍ່-ແມ່ ຂອງນັກຮຽນຮຽກຮ້ອງ.

       ຂະນະດຽວກັນ, ທ່ານ ສຈ.ປອ ຄຳລືຊາ ນວນສະຫວັນ ໄດ້ລາຍງານຜົນສຳເລັດໃນການຈັດສົ່ງນັກສຶກສາໄປຮຽນຕໍ່ຢູ່ຕ່າງປະເທດໃນໄລຍະຜ່ານມາໃຫ້ຮູ້ວ່າ: ນັກສຶກສາລາວທີ່ໄດ້ໄປຮຽນຕ່າງປະເທດ ໃນໄລຍະ 5 ປີຜ່ານມາ (2011-2015) ມີຈຳນວນ 17.094 ຄົນ ໃນ 37 ປະເທດ. ໃນນັ້ນ, ປະເທດຫວຽດນາມ ມີຈຳນວນ 11.582 ຄົນ ເທົ່າກັບ 67,8 ເປີເຊັນ, ຈີນ ມີ 3.289 ຄົນ ເທົ່າກັບ 19,2 ເປີເຊັນ, ໄທ ມີ 960 ຄົນ ເທົ່າກັບ 5,6 ເປີເຊັນ, ຍີ່ປຸ່ນ ມີ 258 ຄົນ ເທົ່າກັບ 1,5 ເປີເຊັນ ແລະ ອອສເຕຣເລຍ ມີ 252 ຄົນ ເທົ່າກັບ 1,5 ເປີເຊັນ.