ຮອງປະທານປະເທດ ແຫ່ງ ສສ ຫວຽດນາມ ພົບປະໂອ້ລົມກັບນັກສຶກສາລາວທີ່ຮຽນຢູ່ຮ່າໂນ້ຍ.

ຮອງ​ປະທານ​ປະ​ເທດ ​ແຫ່ງ ສສ ຫວຽດນາມ ພົບ​ປະ​ໂອ້​ລົມ​ກັບ​ນັກ​ສຶກສາລາ​ວທີ່ຮ​ຽນ​ຢູ່ຮ່າ​ໂນ້ຍ.

         ເນື່ອງ​ໃນ​ໂອ​ກາດສົກຮຽນ​ໃໝ່ 2014-2015. -ໃນ​ຕອນ​ບ່າຍ​ຂອງ​ວັນ​ທີ17ຕຸລາ 2014, ທ່ານ ນາງ ​ຫງວຽນ ທິ ຢວານ, ກຳມະການ​ສູນ​ກາງ​ພັກ, ຮອງ​ປະທານ​ປະ​ເທດ ​ແຫ່ງ ສສ ຫວຽດນາມ ​ໄດ້​ພົບ​ປະ​ໂອ້​ລົມ​ກັບ​​ນັກ​ສຶກສາ, ນັກ​ຄົ້ນຄວ້າ​ລາວ ທີ່​ກຳລັງ​ສຶກສາ​ຄົ້ນຄວ້າ​ຮ່ຳຮຽນ​ຢູ່ ສສ ຫວຽດນາມ ​​ເຊິ່ງ​ມີ​ຜົນງານ​ດີ​ເດັ່ນ​ຮອບດ້ານ ຈຳນວນ 40 ຄົນ. ​ເຂົ້າ​ຮ່ວມ​ງານ​ພົບ​ປະ​ໂອ້​ລົມ​ຄັ້ງ​ນີ້ ມີ​ທ່ານ​ສົມ​ພອນ ສີ​ຈະ​ເລີ​ນ, ​ເອກ​ອັກຄະ​ລັດຖະທູດ​ຜູ້​ມີ​ອຳນາດ​ເຕັມ​ແຫ່ງ ສປປ ລາວ​ປະຈຳ ສສ ຫວຽດນາມ ພ້ອມ​ດ້ວຍຜູ້​ຊ່ວຍ​ທ່ານ​ຮອງ​ປະທານ​ປະ​ເທດ, ຄະນະ​ນຳ​ຫ້ອງການ​ພົວພັນ​ຕ່າງປະ​ເທດ, ຫ້ອງການ​ປະທານ​ປະ​ເທດ, ກະຊວງ​ການ​ຕ່າງປະ​ເທດ ​ແລະ ກະຊວງ​ສຶກສາ ​ແລະ ກໍ່ສ້າງ​ຫວຽດນາມ.

         ​ໃນ​ໂອກາດ​ພົບ​ປະ​ໂອ້​ລົມ​ກັບ​ນັກ​ສຶກສາລາ​ວຄັ້ງ​ນີ້, ທ່ານ ຮອງ​ປະທານ​ປະ​ເທດ ຫງວຽນ ທິ ຢວານ, ໄດ້​ຊົມ​ເຊີຍ​​ຜົນງານ​ທີ່​ນັກ​ສຶກສາລາ​ວຍາດ​ມາ​ໄດ້​ໃນ​ໄລຍະ​ຜ່ານ​ມາ ​ແລະ ຮຽກຮ້ອງ​​ໃຫ້​ນັກ​ສຶກສາ​ລາວຈົ່ງສືບຕໍ່ເອົາ​ໃຈ​ໃສ່​ໃນ​ການສຶກສາ​ຮ່ຳຮຽນ, ຍາດ​ແຍ່ງ​ເອົາ​ບົດຮຽນ​ໃໝ່ໆ​ຈາກ​ຄູ​ອາຈານ ພ້ອມ​ດຽວ​ກັນ​ນັ້ນ ກໍ​ເອົາ​ໃຈ​ໃສ່​ສຶກສາ​ຄົ້ນຄວ້າປະຫວັດສາດ-ມູນ​ເຊື້ອ​ການ​ພົວພັນ​ລະຫວ່າງ​ສອງ​ປະ​ເທດ​ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການເສີມ​ຂະຫຍາຍ​ຄວາມ​ສາມັກຄີ​ພິ​ເສດ, ການ​ຮ່ວມ​ມື​ຮອບດ້ານ​ລະຫວ່າງ ສອງ​ພັກ, ສອງ​ລັດ ​ແລະ ປະຊາຊົນ ສອງ​ຊາດ​ລາວ-ຫວຽດນາມ​ໃຫ້​ນັບ​ມື້​ນັບ​ແຕກ​ດອກ​ອອກ​ຜົນ. ​ໃນ​ງານ​ພົບ​ປະ​ຄັ້ງ​ນີ້, ທ່ານ ຫງວຽນ ທິ ຢວານ, ຮອງ​ປະທານ​ປະ​ເທດ ​ແຫ່ງ ສສ ຫວຽດນາມ​​ໄດ້​ມອບ​ເງິນ ຈຳນວນ 100.000.000 ດົ່ງ (ໜຶ່ງ​ຮ້ອຍ​ລ້ານ​ດົ່ງ) ​ເຂົ້າ​ກອງ​ທຶນ​ເພື່ອ​ພັດທະນາ​ການ​ສຶກສາ​, ການ​ເຄື່ອນ​ໄຫວ​ກິດຈະກຳ​ຕ່າງໆ​ທີ່​ສຳຄັນ​ຂອງ​ນັກ​ສຶກສາ ​ແລະ ​ໄດ້​ມອບ​ຂອງຂວັນ ພ້ອມ​ດ້ວຍທຶນ​ການ​ສຶກສາໃຫ້​​ແກ່ນັກ​ສຶກສາ​ລາວ​ ຈໍຳນວນ 40 ຄົນ ທີ່​ມີ​ຜົນງານ​ດີ​ເດັ່ນ​​ໃນ​ການ​ຮ່ຳຮຽນ ຈຳນວນ 80.000.000 ດົ່ງ(​ແປດ​ສິບ​ລ້ານ​ດົ່ງ).